Ramazan bayramı münasibətilə mayın 25-də Azərbaycan Könüllülərinin Əlaqələndirmə Mərkəzinin (AKƏM) təşəbbüsü ilə könüllülər paytaxt və regionlarda yaşayan 100-ə yaxın aztəminatlı ailə və tənha yaşayan ahıl vətəndaşları ziyarət edib, onlara bayram sovqatı çatdırıblar.
Mərkəzdən AZƏRTAC-a bildiriblər ki, Ramazan ayının ehtiva etdiyi yardımlaşma, xeyirxahlıq və həmrəylik kimi xüsusiyyətləri bu aksiya ilə bir daha nümayiş etdirən könüllülər COVID-19 pandemiyasının davam etdiyi dövrdə məhz birlikdə və məsuliyyətli olmaqla bütün çətinlikləri arxada qoyacağımızı yorulmaz fəaliyyətləri ilə sübuta yetirirlər.
Azərbaycan Könüllülərinin Əlaqələndirmə Mərkəzi Prezidenti İlham Əliyevin çağırışına cavab olaraq, koronavirus infeksiyasının ölkəmizdə yayılmasının və onun törədə biləcəyi fəsadların qarşısının alınması məqsədilə dövlət tərəfindən atılan bütün zəruri addımlara, xüsusilə əhalinin maarifləndirilməsi və qayğıya ehtiyacı olan insanlara sosial xidmətlərin göstərilməsi istiqamətində həyata keçirilən tədbirlərə töhfə vermək məqsədilə könüllü hərəkat və təşkilatlarının təşəbbüsü ilə təsis edilib.
Bu il martın 27-də formalaşan və fəaliyyətində “ASAN Könüllüləri” Təşkilatı, “Regional İnkişaf” İctimai Birliyi, “Bir Könüllü” Tələbələrin Əməkdaşlığı İctimai Birliyi, “Könüllü DOST” Proqramı, “Aqrar İnkişaf Könüllüləri” İctimai Birliyi, “Nəqliyyat Könüllüləri” Proqramı, “Formula 1 Azərbaycan Qran Prisi” Könüllülük Proqramı, “Miqrasiya Könüllüsü” İctimai Birliyi, “Könüllü gömrükçü” Dəstəsi, “Turizm Könüllüləri” Təşkilatı, “Ekokönüllüləri” Qrupu, “AFFA və Avro-2020” Könüllülər Proqramı, “Gənc Könüllülər” Hərəkatı və digər təşkilat və hərəkatların iştirak etdiyi Mərkəzin işinin əlaqələndirilməsi Azərbaycan Respublikası Gənclər Fondu tərəfindən həyata keçirilir.
Fəaliyyətində Azərbaycan Respublikası Prezidentinin “Biz birlikdə güclüyük!” şüarını rəhbər tutan AKƏM tərəfindən respublikanın demək olar ki, bütün şəhər və rayonlarında könüllülər səfərbər olunub, onların əlaqələndirilməsi və lazımi fəaliyyətlərə yönləndirilməsi həyata keçirilib. Bugünədək AKƏM-in təşkilatçılığı ilə keçirilən “Böyüklərimizi qoruyaq!”, “Könüllü qonşu”, “Könüllü donor”, “Bir-birimizi qoruyaq!” kampaniya və aksiyalarında minlərlə könüllü iştirak edib.
