Yanvarın 18-də SOCAR-ın prezidenti Rövnəq Abdullayev Türkdilli Dövlətlərin Əməkdaşlıq Şurasının (Türk Şurası) nümayəndə heyəti ilə görüşüb.
Şirkətdən AZƏRTAC-a bildirilib ki, görüşdə çıxış edən Türk Şurasının Baş katibi Bağdad Amreyev Qarabağın azadlığı uğrunda ölkəmizin haqq mübarizəsində türk xalqlarının Azərbaycanın yanında olduğunu bildirib. Baş katib Prezident İlham Əliyevin ötən il Türk Şurasının sədri olduğu qeyd edərək Azərbaycanın Türk Şurasının işində vacib rol oynadığını və Azərbaycan Prezidentinin hazırda türkdilli xalqlar arasında çox populyar şəxs olduğunu xüsusi qeyd edib. Qonaq, həmçinin türkdilli ölkələrin işğaldan azad edilmiş Qarabağın bərpası prosesində birgə fəaliyyətinin zərurətindən söz açıb.
R.Abdullayev türkdilli ölkələr arasında birliyin gücləndirilməsində iqtisadi əməkdaşlığın əhəmiyyətindən bəhs edib, SOCAR-ın bu işə töhfələri haqqında məlumat verib. Qeyd olunub ki, hazırda SOCAR-ın əməliyyatları Türkiyə ilə Azərbaycan arasında iqtisadi əməkdaşlığın əsasını təşkil edir. Bu iqtisadi əməkdaşlığın təməli ulu öndər Heydər Əliyevin yeni neft strategiyası ilə qoyulub, neft ixracının qərbə istiqamətləndirilməsi Azərbaycanla Türkiyəni bir-birinə daha da sıx bağlayıb.
SOCAR-ın prezidenti, həmçinin digər türkdilli dövlətlərlə də iqtisadi əlaqələrin inkişafından söhbət açıb. O qeyd edib ki, SOCAR-la əməkdaşlıq çərçivəsində Qazaxıstanın “Kazmunayqaz” şirkətinin “Sətti” qazma qurğusu Xəzər dənizinin Azərbaycan sektorunda qazma işlərinə cəlb olunub. Türkmənistanla neft-qaz ticarəti istiqamətində əməkdaşlıq genişlənməkdədir. Özbəkistanın “Özbəkneftqaz” şirkəti ilə kəşfiyyat istiqamətində işlərin genişləndirilməsi məqsədilə üçtərəfli əməkdaşlıq sazişi imzalanıb. Türk Şurasının fəal üzvü olan Macarıstanın “MOL” şirkəti “Azəri-Çıraq-Günəşli” yataqlarının işlənməsində və Bakı-Tbilisi-Ceyhan boru kəmərində paya malikdir.
Qeyd olunub ki, SOCAR son 15 il ərzində Prezident İlham Əliyevin tapşırığı ilə lokal şirkətdən qlobal şirkətə çevrilib və iqtisadi əməkdaşlıq coğrafiyasını genişləndirib. Görüşdə gələcəkdə türkdilli dövlətlərin enerji sahəsində birgə layihələrinin reallaşdırılması, həmçinin futbol sahəsində əməkdaşlığın perspektivləri müzakirə olunub.
Görüşdə AFFA-nın icraçı vitse-prezidenti Elxan Məmmədov da iştirak edib.
