Azərbaycan karateçiləri Bakıda keçirilən Karate1 Premyer Liqa turnirini 6 medalla başa vurublar.
Trend xəbər verir ki, mötəbər yarışda karateçilərimiz 3 qızıl və 3 bürünc medala sahib olublar.
Təmsilçilərimizdən Əminağa Quliyev (60 kiloqram), İrina Zaretska (68 kiloqram) və Asiman Qurbanlı (+84 kiloqram) fəxri kürsünün ən yüksək pilləsinə qalxıblar.
Bürünc medalları isə yığmamıza Tural Ağalarzadə (67 kiloqram), Turqut Həsənov (84 kiloqram) və Murad Hacızadə (+84 kiloqram) qazandırıblar.
Turnirdə 58 ölkədən 348 karateçi medallar uğrunda mübarizə aparıb.
Bakıda Dünya Karate Federasiyasının (WKF) ən nüfuzlu yarışı olan Karate1 Premyer Liqa turniri ilk dəfədir keçirilib. Turnirin iştirakçıları arasında Olimpiya, dünya və qitə çempionları və mükafatçıları yer alıblar. Turnir kişi və qadın kumiteçilərin hər birində 5 olmaqla, 10 çəki dərəcəsi üzrə, eləcə də kişi və qadın kataçılar arasında keçirilib. 12 kateqoriyanın hər birində 32 idmançı mübarizə aparıb. Onlar əsasən dünya reytinq cədvəlinin ilk 32 pilləsini tutan karateçilər olub.
