Böyük Britaniya Kralı III Çarlz Pasxa mərasimində ilk dəfə olaraq monarx kimi iştirak edib. İbadət London yaxınlığındakı Berkşirdə, Vindzor qəsri ərazisində yerləşən Müqəddəs Georgi kilsəsində keçirilib.
AZƏRTAC Britaniya KİV-ə istinadla xəbər verir ki, Kral III Çarlzı onun həyat yoldaşı Kamilla, böyük oğlu – taxtın varisi Uels şahzadəsi Uilyam və ailəsi, həmçinin onun bacısı Şahzadə Anna və hər iki qardaş – şahzadələr Endrü və Edvard ailələri ilə birlikdə müşayiət ediblər.
Bu il aprelin 9-da katoliklər və protestantlar tərəfindən qeyd olunan Pasxa bayramı III Çarlzın tacqoyma mərasiminə bir aydan az qalmış vaxtda baş tutub. Tacqoyma mərasimi mayın 6-na planlaşdırılıb və Londondakı Vestminster abbatlığında 2000 nəfərin iştirakı ilə keçiriləcək.
