“Azərbaycan Hava Yolları” QSC (AZAL) iyunun 3-də Bakı-Buxarest-Bakı marşrutu üzrə ilk reysini uğurla həyata keçirib.
“Report” AZAL-a istinadən xəbər verir ki, aviaşirkətin təyyarəsi ənənəvi olaraq su tağı ilə qarşılanıb. Bakı-Buxarest-Bakı marşrutu üzrə uçuşlar həftədə iki dəfə olmaqla bazar ertəsi və cümə axşamı günləri yerinə yetiriləcək.
Buxarestdə aviaşirkətin ilk reysinin yerinə yetirilməsi münasibətilə mərasim keçirilib. Tədbirdə Azərbaycanın Rumıniyadakı səfiri Qüdsi Osmanov, Rumıniyanın Azərbaycandakı səfiri Vasile Soare, Rumıniyanın iqtisadiyyat, sahibkarlıq və turizm naziri Ştefan-Radu Oprea, Rumıniyanın İqtisadiyyat, Sahibkarlıq və Turizm Nazirliyinin Turizm Baş İdarəsinin baş direktoru İoana Podosu, Dövlət Turizm Agentliyinin Aparat rəhbəri Kənan Qasımov, Azərbaycan Turizm Bürosunun İdarə Heyətinin sədr müavini Cavanşir Bayramov, “Azərbaycan Hava Yolları” aviaşirkətinin Satış və əməkdaşlıq idarəsinin rəisi Çingiz Mürsəlov, aviaşirkətin Satış və əməkdaşlıq idarəsinin Avropa regionu üzrə nümayəndəsi Kamran Qacar, eləcə də digər rəsmi şəxslər iştirak ediblər.
İştirakçılar öz çıxışlarında Azərbaycan və Rumıniya arasında əlaqələrin möhkəmləndirilməsi, həmçinin qarşılıqlı turizm mübadiləsinin stimullaşdırılması üçün Bakı-Buxarest-Bakı marşrutu üzrə birbaşa aviareyslərin açılmasının vacibliyini vurğulayıblar. Azərbaycanın turizm ölkəsi kimi tanıdılması istiqamətində genişmiqyaslı tədbirlərin həyata keçirildiyi, dövlət səviyyəsində turizmin inkişafına xüsusi diqqət ayrıldığı bildirilib.
Qeyd edilib ki, birbaşa uçuşların açılması Azərbaycanı rumıniyalı turistlər üçün daha əlçatan edəcək və iki ölkə arasında turist axınına müsbət təsir göstərəcək. Turizm əlaqələrinin inkişafı iki ölkənin xalqları arasında dostluq münasibətlərinin daha da möhkəmlənməsinə töhfə verəcəkdir.
Uçuş cədvəli ilə tanış olmaq və aviabiletləri əldə etmək üçün aviaşirkətin rəsmi www.azal.az saytına keçid ala və ya mobil tətbiqinə daxil olmaq lazımdır.
