Türkiyənin Qafqaz Universitetinin rektoru Hüsnü Kapunun rəhbərlik etdiyi nümayəndə heyəti Azərbaycanın Türkiyə Respublikasındakı Səfirliyinin təhsil məsələləri üzrə müşaviri Nəcibə Nəsibovanın müşayiəti ilə Gəncə Dövlət Universitetində (GDU) olub və ali təhsil ocağının rektoru Yusif Yusibovla görüşüblər.
Görüşdə GDU-nun Tədris məsələləri üzrə prorektoru Şahin Xurşudov və İnnovasiyalar Departamentinin direktoru Vasif Həsənov da iştirak ediblər.
Universitetdən AZƏRTAC-ın bölgə müxbirinə verilən məlumata görə, Y.Yusibov ali təhsil ocağının tədris, elmi fəaliyyəti, beynəlxalq əlaqələri, eləcə də Türkiyənin bir neçə nüfuzlu universiteti ilə əməkdaşlıq əlaqələri haqqında danışıb. Bildirib ki, İzmir Dokuz Eylül Universiteti ilə imzalanmış müqaviləyə uyğun olaraq ikili diplom proqramı uğurla davam edir.
Hüsnü Kapu rəhbərlik etdiyi ali təhsil ocağının fəaliyyət istiqamətləri, tədris olunan ixtisaslar və kadr hazırlığı üzrə aparılan işlərdən danışıb.
Söhbət zamanı hər iki universitet arasında akademik mübadilə və əməkdaşlıq məsələləri müzakirə edilib.
Daha sonra birgə akademik əməkdaşlıq müqaviləsi imzalanıb. Sənəddə tələbələrin, akademik və inzibati heyətin, nəşrlərin və digər materialların qarşılıqlı mübadiləsi, birgə seminar, tədris proqramlarının təşkili, ortaq elmi-tədqiqat və inkişaf layihələrinin həyata keçirilməsi öz əksini tapıb.
