İyulun 27-də Qırğız Respublikasının Çolpon-Ata şəhərində VII Beynəlxalq “İssık-Kul 2023” iqtisadi forumu keçirilib.
AZƏRTAC xəbər verir ki, Baş nazirin müavini Əli Əhmədovun başçılıq etdiyi nümayəndə heyəti forumda iştirak edib.
Qırğız Respublikasının Nazirlər Kabinetinin sədri Akılbek Joparov forum iştirakçılarını salamlayıb.
Forumda çıxış edən Ə.Əhmədov vurğulayıb ki, Azərbaycan regional və qlobal miqyasda əməkdaşlığın, sülhün və dialoqun təmin edilməsinə yönəlmiş strateji kurs həyata keçirir.
Qeyd olunub ki, Avropa ilə Asiyanın kəsişməsində yerləşən Azərbaycan regiondakı tərəfdaşları ilə birlikdə nəqliyyat kommunikasiyalarının inkişafına, regional və kontinental ticarətin genişlənməsinə istiqamətlənmiş təşəbbüslər və layihələrdə iştirak edir.
Azərbaycan Şimal-Cənub və Şərq-Qərb Beynəlxalq Nəqliyyat dəhlizləri, Bakı-Tbilisi-Qars və digər layihələr üzrə zəncirin mühüm hissəsidir. “Biz Azərbaycan ərazisindən keçməklə müxtəlif marşrutlar üzrə yükdaşımalarda illik artım müşahidə edirik. 2022-ci ilin yekunlarına görə, artım 75 faiz təşkil edib. Biz ölkəmizin ərazisindən keçməklə yükdaşımalarda sürətli artım gözləyirik”, – deyə Ə.Əhmədov vurğulayıb.
Forum iştirakçılarına Bakı Beynəlxalq Dəniz Ticarəti Limanının gücünün artırılması, Azərbaycanda doqquzuncu beynəlxalq aeroport və işğaldan azad olunmuş ərazilərdə üçüncü hava limanı olacaq Laçın aeroportunun tikintisi barədə məlumat verilib.
Diqqətə çatdırılıb ki, bütün bu tədbirlər Azərbaycanın tranzit potensialının xeyli genişlənməsinə şərait yaradır, bu da daşımaların artması ilə bağlı problemlərin səmərəli həllinə kömək edəcək və beynəlxalq nəqliyyat dəhlizlərinin fasiləsiz işini təmin edəcək.
Forumda qeyd edilib ki, Azərbaycanın Böyük İpək yolunun bərpası və Orta Dəhlizin inkişafı üzrə strategiyası Çinin “Bir kəmər, bir yol” layihəsinin reallaşdırılmasına dair konsepsiya ilə üst-üstə düşür. Tədbir iştirakçılarının diqqətinə çatdırılıb ki, Azərbaycan Çinin təşəbbüsünü dəstəkləyən ilk ölkələrdən biri olub.
Baş nazirin müavini, həmçinin Azərbaycanın Avropanın enerji təhlükəsizliyinin təmin edilməsində mühüm rolundan danışıb. Bu kontekstdə Xəzər regionunu Avropaya, qlobal enerji təhlükəsizliyi sisteminə birləşdirən Cənub Qaz Dəhlizinin mühüm töhfəsi qeyd edilib.
Təbii qazla yanaşı, Azərbaycanın alternativ enerjinin inkişafı üçün böyük potensiala malik olduğunu vurğulayan Ə.Əhmədov deyib ki, dövlətimizin başçısı 2030-cu ilə qədər bərpaolunan enerji mənbələrinin ölkənin energetika sistemində payının 30 faizə çatdırılmasına dair hökumət qarşısında vəzifə qoyub. Artıq bu istiqamətdə dünyanın qabaqcıl şirkətləri ilə birgə iri layihələr həyata keçirilir.
Baş nazirin müavini, həmçinin Qırğızıstanı sosial-iqtisadi sahədə əldə olunmuş uğurlar münasibətilə təbrik edib. Qeyd olunub ki, Qırğızıstanda mühüm dövlət proqramları səmərəli şəkildə həyata keçirilir, əhalinin rifah halı yaxşılaşır, ölkənin investisiya cəlbediciliyi artır.
