Azərbaycan hakimiyyətinin ölkədə demokratik dəyərlərin möhkəmlənməsi ilə bağlı qətiyyətli və ardıcıl mövqeyi xalqın ümumi iradəsinin milli maraqlar ətrafında birləşdirilməsi kimi çox mühüm amillərə meydan açıb. Ölkədə aparılan inqilabi islahatların davamı olan 2020-ci il fevralın 9-da keçirilən növbədənkənar parlament seçkiləri bir daha təsdiq etdi ki, Prezident İlham Əliyevin uzaqgörən, müdrik siyasəti Azərbaycan xalqının iradəsini tam şəkildə ifadə edir.
Bunu Trend-ə millət vəkili Naqif Həmzəyev bildirib.
Millət vəkili qeyd edib ki, VI çağırış Milli Məclisin ilk iclasında ölkə Başçısının çıxışının ana xəttini də məhz dövrün, zamanın tələbinə uyğun təkmilləşən qanunverici qurumun dövlətimizin strateji xəttilə bağlı bütün məsələlərdə proqram xarakterli tövsiyələri təşkil edib:
“Hər zaman sosial sahəyə diqqətin artırılmasını önə çəkən Prezident İlham Əliyev qanunvericilikdə vətəndaşların rifahının yüksəldilməsinin diqqət mərkəzində olmasını yeni zamanın yeni çağırışlarına uyğun fəaliyyət göstərəcək deputatların qarşısına məqsəd kimi qoydu. Ölkədə həyata keçirilən inqilabi xarakter daşıyan islahatların içərisində yer alan növbədənkənar parlament seçkilərinin nəticəsi ölkəmizin davamlı tərəqqisinə hesablanan iqtisadi və sosial xarakterli yeni qanunların qəbul edilməsi deputatların dövlətimizin milli maraqlara xidmət edən strateji xəttilə bağlı bütün məsələlərdə cəsarət nümayiş etdirmələri ilə öz təsdiqini tapmalıdır”.
Millət vəkilinin sözlərinə görə, ölkədəki bütün siyasi qüvvələrin iştirak etdiyi seçkilər nəticəsində çoxpartiyalı parlament kimi formalaşan Azərbaycan Respublikasının Milli Məclisində Yeni Azərbaycan Partiyası yerlərin əksəriyyətini qazanması, partiyaların nümayəndələrinin Milli Məclisin rəhbərliyində və komitələrin rəhbərliyində təmsil olunmaları da Azərbaycanda siyasi sistemi möhkəmləndirməyə, siyasi münasibətləri sağlam zəmində gücləndirməyə yönəldilən addımlardandır:
“Milli Məclisdə təmsil olunan partiyaların məsuliyyət yükünün artırılmasına xidmət edən amillərə diqqət çəkən ölkə Prezidenti siyasi islahatların zəruriliyi üzərində də dayanaraq bildirib ki, Yeni Azərbaycan Partiyası ümumi maraqlar naminə bu sahədə də çox düzgün addım atır. Milli Məclisdə təmsil olan partiyaların nümayəndələrinin parlament rəhbərliyində təmsil olunması siyasi sistemdə partiyaların yerini və rolunu artırmaq yolunda atılan cəsarətli addımın başlanğıcı oldu. Ölkə Başçısının xeyir-duası ilə işinə başlayan VI çağırış Milli Məclisin deputatları olaraq qarşımızda dayanan müasir çağırışlara cavab verməli, fəaliyyətimizi Prezident İlham Əliyevin proqram xarakterli tövsiyə və tapşırıqlarına uyğun qurmalıyıq. Hansı partiyanı təmsil etməyimizdən asılı olmayaraq dövrün, zamanın tələbinə uyğun qərarlara imza ataraq ölkəmizin güclü iqtisadiyyatı, cəmiyyətimizin firavanlığı naminə birlik olmalı, Vətənimizin daha parlaq gələcəyi üçün var qüvvə ilə çalışmalıyıq”.
