Qərbi Azərbaycan İcmasında Türkiyə Böyük Millət Məclisinin bir qrup üzvü ilə görüş keçirilib.
“Report” xəbər verir ki, türkiyəli qonaqları salamlayan Qərbi Azərbaycan İcmasının sədri Əziz Ələkbərov bildirib ki, qardaş ölkənin parlamentarilərinin İcmanı ziyarət etməsi böyük mənəvi önəm daşıyır. Azərbaycanlıların ötən əsr boyunca dörd dəfə oz doğma torpaqlarından qovulması barədə məlumat verən sədr bu hadisələr zamanı azərbaycanlılara qarşı törədilmiş müharibə cinayətləri və insanlıq əleyhinə cinayətlər barədə danışıb.
İcmanın Ağsaqqallar Şurasının sədri, Milli Məclisin Azərbaycan – Türkiyə dostluq qrupunun rəhbəri Əhliman Əmiraslanov bildirib ki, qovulmuş azərbaycanlıların Ümumdünya İnsan Haqları Bəyannaməsi və digər beynəlxalq konvensiyalar çərçivəsində tanınmış hüquqlarının təmin edilməsi üçün beynəlxalq ictimaiyyətin dəstəyi vacibdir.
TBMM-in Azərbaycanla parlamentlərarası dostluq qrupunun rəhbəri Şamil Ayrım azərbaycanlıların başına gələn müsibətlərə görə kədərləndiyini dilə gətirərək beynəlxalq konvensiyalara uyğun olaraq onların geri qayıtmaq hüququnun bərpa olunmasının zəruriliyini vurğulayıb.
Görüşdə Qərbi Azərbaycan icmasının əsas orqanlarının rəhbərləri və Türkiyəki millət vəkilləri Orhan Erdem, Yunus Kılıç, Tülay Kaynarca, Uğur Bayraktutan, Yaşar Karadağ, TBMM beynəlxalq şöbəsinin əməkdaşı Ertuğrul Akay, səfirliyin əməkdaşı Öncü Güneş iştirak ediblər.
