Oktyabrın 23-də axşam saatlarında Gürcüstanın paytaxtı Tbilisinin Vazisubani rayonundakı yaşayış binalarının birində güclü partlayış olub. Nəticədə bir neçə nəfər yaralanıb, onlardan üçü xəstəxanaya yerləşdirilib.
AZƏRTAC-ın xüsusi müxbirinin hadisə yerindən verdiyi xəbərə görə, partlayışa mənzildə qaz sızması səbəb olub.
Yanğın söndürülüb, binanın bir hissəsi yararsız hala düşüb. Bəzi mənzillərdən sakinlər təxliyə olunublar.
Tbilisidəki Simon Xeçinaşvili Universitetinin Klinikasına gətirilən yaralılardan birinin vəziyyəti ağırdır və o, reanimasiya şöbəsinə yerləşdirilib.
Faktla bağlı araşdırma başlanılıb.
