Azərbaycan Qida Təhlükəsizliyi İnstitutunun (AQTİ) nəzdində fəaliyyət göstərən Mərkəzi Fitosanitar Laboratoriyasında işçilərin peşəkarlığının yüksəldilməsi, həmçinin laboratoriya nəticələrinin tanınması məqsədilə bu sahədə fəaliyyət göstərən xarici ölkə laboratoriyaları, beynəlxalq təşkilatlarla əməkdaşlıq əlaqələri daima inkişaf etdirilir. Laboratoriya mütəxəssisləri mütəmadi olaraq xarici ölkələrdə təlimlərdə iştirak edir, təcrübə mübadiləsi aparırlar.
Qarşılıqlı təcrübə mübadilələrində bitki sağlamlığı sahəsində Türkiyə laboratoriyaları ilə əlaqələrin qurulmasına və əməkdaşlığa böyük əhəmiyyət verilir. Bu əməkdaşlıq çərçivəsində türkiyəli mütəxəssis virusoloq Üftade Güner Mərkəzi Fitosanitar Laboratoriyada çalışır. Ü. Güner bitki və bitkiçilik məhsullarında entomoloji, herboloji, bakterioloji, mikrobioloji, virusoloji və digər ekspertizaların həyata keçirilməsində təcrübəsini laboratoriyanın əməkdaşları ilə bölüşür. Həmçinin AQTİ mütəxəssislərinin iştirakı ilə fitosanitar risk daşıyan fitopatogen virusların müayinəsini aparılır. Türkiyəli mütəxəssis laboratoriya əməkdaşlarının səriştəliliyini, ölkədə fitosanitar təhlükəsizliyin təmin edilməsi istiqamətində əldə edilən uğurları yüksək dəyərləndirərək, fitopatogen zərərli orqanizmlərin diaqnostikasının beynəlxalq standartlara uyğun metodlarla həyata keçirildiyini bildirib.
Qeyd edək ki, ölkədə qida təhlükəsizliyinin təmin edilməsi və əhalinin sağlamlığının qorunması məqsədilə Azərbaycan Qida Təhlükəsizliyi İnstitutunun laboratoriyalarının beynəlxalq standartlara uyğunlaşdırılması istiqamətində mütəmadi olaraq zəruri tədbirlər görülür.
