Səhiyyə Nazirliyi və “PAŞA Holding”in birgə təşkilatçılığı ilə “Erkən müayinə can qurtarır” adlı növbəti aksiya Xaçmaz rayonunda reallaşıb.
AZƏRTAC-ın bölgə müxbiri xəbər verir ki, diabet xəstəliyinin erkən müayinəsi üçün təşkil olunan aksiyada Xaçmaz və ətraf rayonlardan olan 300 nəfər müayinə olunub.
“Fərqindəlik” layihəsinin rəhbəri Şəbnəm Həsənova bildirib ki, “Erkən müayinə can qurtarır” adlı tibbi müayinə Xaçmazdan əvvəl Göyçay və Sabirabadda təşkil edilib. Kampaniya ölkə üzrə ümumilikdə 24 rayonu, o cümlədən işğaldan azad edilən rayonları da əhatə edəcək. Aksiyanın məqsədi diabet xəstəliyinin erkən mərhələlərində diaqnostikasını aparmaq, xəstəliyin qarşısını almaq və yerli əhali arasında sağlam həyat tərzi barədə maarifləndirməni gücləndirməkdir.
Aksiya zamanı sakinlər arasında erkən müayinənin əhəmiyyəti haqqında maarifləndirici söhbətlər aparılıb. Onlara diabetin erkən mərhələlərdə aşkar olunmasının vacib olduğu izah edilib. Sakinlərin diqqətinə çatdırılıb ki, xəstəliyin erkən diaqnozu sayəsində ciddi sağlamlıq problemlərinin qarşısı alınır və müalicə daha effektiv olur. Erkən müayinə diabetin həm fiziki, həm də sosial təsirlərini azaltmağa kömək edir. Diabetin nəzarət altında saxlanması ilə xəstələr gündəlik həyatlarında daha aktiv və sağlam ola bilərlər.
“Erkən müayinə can qurtarır” adlı növbəti aksiya Masallı rayonunda təşkil olunacaq.
